askwala.com - ለግንዛቤዎ የማሻሻያ አዋጆቹ ገጽታዎች
Header







ለግንዛቤዎ የማሻሻያ አዋጆቹ ገጽታዎች


የተጨማሪ እሴት ታክስ አዋጅ ቁጥር 285/2002 እንደገና ማሻሻል አስፈላጊ ሆኖ በመገኘቱ የተጨማሪ እሴት ታክስ (ማሻሻያ) አዋጅ ቁጥር 1157/2019 ወጥቷል፡፡
አዲሱ የተጨማሪ እሴት ታክስ አዋጅ ማሻሻያ በጠቅላላው የተጨማሪ እሴት ታክስ ማሳወቂያ ጊዜ ከቀደመው አዋጅ በተለየ መልኩ ግብር ከፋዮች እንዲያሳውቁ አድርጓል፡፡
በማሻሻያ አዋጁ በማንኛቸውም 12 ወራት ውስጥ ያከናወነው ጠቅላላ ሽያጭ ብር 70,000,000.00ብር (ሰባ ሚሊዮን ብር) እና ከዚያ በላይ ለሆነ ታክስ ከፋይ በእያንዳንዱ ወር (እንደ ቀድሞው) የተጨማሪ እሴት ታክስን በየወሩ እንዲያሳውቅ (እንዲከፍል) ያዛል፡፡ እንዲሁም በማሻሻያ አዋጁ በማናቸውም በአስራ ሁለት ወራት ውስጥ ያከናወነው ጠቅላላ ሽያጭ ብር 70,000,000.00 ብር (ሰባ ሚሊዮን ብር) በታች የሆነ ታክስ ከፋይ በየ3 (ሶስት) ወሩ እንዲያሳውቅ (እንዲከፍል) ይደነግጋል፡፡ በዚህ አዋጅ 1157/2019 ነሐሴና ጳጉሜን እንደ አንድ ወር እንደሚቆጠሩ ያስቀምጣል፡፡ ይህንኑ በተመለከተም በተለየዩ ጊዜያት መረጃ ስናደርስ የቆየን ሲሆን በዚህ ጽሑፍ ስለታክሱ ተጨማሪ ገጽታዎች መረጃ ቀርቦበታል፡፡
የኤክሳይዝ ታክስን የመክፈል ግዴታን ስለመወጣት
1/ የተፈቀደለት አምራች በአንድ ወር ውስጥ ከማምረቻው ፋብሪካ ወጪ ባደረጋቸው ዕቃዎች ላይ ሊከፍል የሚገባውን የኤክሳይዝ ታክስ የሚቀጥለው ወር 30ኛው ቀን ከማለፉ በፊት ለታክሱ ባለሥልጣን ገቢ ማድረግ አለበት፡፡
2/ አስመጪ ወደአገር ውስጥ ባስገባቸው የኤክሳይዝ ታክስ በሚከፈልባቸው ዕቃዎች ላይ ሊከፍል የሚገባውን የኤክሳይዝ ታክስ ዕቃዎቹ ወደአገር በገቡበት ጊዜ ለታክሱ ባለሥልጣን መክፈል አለበት፡፡
3/ ወደአገር ውስጥ በሚገቡ የኤክሳይዝ ታክስ በሚከፈልባቸው ዕቃዎች ላይ ታክሱ የሚሠላው፣ የሚከፈለው፣ ሂሳቡ የሚያዘው እና የታክሱ ዕዳ በአስገዳጅነት የሚሰበሰበው በጉምሩክ ሕግ መሠረት ይሆናል፡፡
የኤክሳይዝ ታክስን በተመለከተ መዝገብ ስለመያዝ
በዚህ አዋጅ የኤክሳይዝ ታክስ የመክፈል ግዴታ የተጣለበት ማናቸውም ሰው በዚህ አዋጅ በተደነገገው እና ባለሥልጣኑ በሚያወጣው መመሪያ መሠረት የሂሳብ መዝገብ መያዝ ያለበት ሲሆን፣ የሚይዘውን የሂሳብ መዝገብ በታክስ አስተዳደር አዋጅ ለተመለከተው ጊዜ እና በተመለከተው አኳኋን ጠብቆ ማቆየት አለበት፡፡
የኤክሳይዝ ታክስን ስለማስታወቅ
በማናቸውም አንድ ወር የኤክሳይዝ ታክስ የሚከፈል ቢሆንም ባይሆንም የተፈቀደለት አምራች የእያንዳንዱን ወር ሂሳብ የሚቀጥለው ወር 30ኛው ቀን ከማለፉ በፊት በፀደቀው ቅጽ እና በታዘዘው አኳኋን ለታክሱ ባለሥልጣን ማስታወቅ አለበት፡፡
ከኤክሳይዝ ታክስ ነፃ የተደረጉ ዕቃዎች
በተሻሻለው የኤክሳይዝ ታክስ መሰረት በዋነኝነት የሚከተሉት ከኤክሳይዝ ታክስ ነፃ ተደርገዋል፡፡
ሀ) የተፈቀደለት የዕቃ መጋዘንን ጨምሮ በባለሥልጣኑ ቁጥጥር ሥር ሆነው ለውጭ ገበያ የሚቀርቡ ዕቃዎች፣
ለ) ከታክሱ ባለሥልጣን አስቀድሞ በተሰጠ የፅሑፍ ፈቃድ መሠረት የታክሱ ባለሥልጣን ሠራተኞች በተገኙበት ከተመረቱበት ፋብሪካ ከመውጣታቸው በፊት በአምራቹ ከጥቅም ውጪ እንዲሆኑ የተደረጉ የኤክሳይዝ ታክስ የተጣለባቸው ዕቃዎች፣
ሐ) ከኤክሳይዝ ታክስ ነፃ የመሆን መብት ላላቸው አካላት የሚሸጡ ኤክሳይዝ ታክስ የተጣለባቸው ዕቃዎች፣
መ) ለኢኮኖሚያዊ፣ ለማህበራዊና ለአስተዳደራዊ ምክንያቶች በሚኒስትሩ ከኤክሳይዝ ታክስ ነፃ የተደረጉ ዕቃዎች፣
ሰ) ለሕክምና አገልግሎት እንዲውል ለሰው በመጠጥነት አገልግሎት ሊሰጥ በማይችልበት አኳኋን የተመረተ አልኮል፣
ረ) በሚከተለው ሁኔታ በአደጋ ወይም በሌላ ከአቅም በላይ በሆነ ምክንያት የጠፉ ወይም የተበላሹ የኤክሳይዝ ታክስ የተጣለባቸው ዕቃዎች፡-
(1) ዕቃዎች የመጫን ወይም የማውረድ ተግባርን ጨምሮ ዕቃዎቹ ከአምራቹ ፋብሪካ በመውጣት ላይ ባሉበት ጊዜ፣
(2) ከፋብሪካው ከመውጣታቸው በፊት ዕቃዎቹ በተመረቱበት በአምራቹ ፋብሪካ ውስጥ ባሉበት ጊዜ፣
(3) ዕቃዎቹ ኢትዮጵያ ከመድረሳቸው በፊት በአውሮፕላን ወይም በመርከብ በመጓጓዝ ላይ ባሉበት ጊዜ ከኤክሳይዝ ታክስ ነጻ ይሆናሉ፡፡
የኤክሳይዝ ታክስ የተጣለባቸው ዕቃዎች የፋብሪካ መሸጫ ዋጋ
1/ የኤክሳይዝ ታክስ የተጣለባቸው ዕቃዎች የፋብሪካ መሸጫ ዋጋ ነው የሚባለው፡-
ሀ) አምራቹ የኤክሳይዝ ታክስ የተጣለባቸውን ዕቃዎች የሸጠው ግንኙነት በሌላቸው ሰዎች መካከል በሚደረግ ግብይት ለገዥው የሆነ እንደሆነ፣ ገዥው የከፈለው ዋጋ፣
ለ) በሌላ በማናቸውም ሁኔታ ዕቃው ከአምራቹ ፋብሪካ በወጣበት ጊዜ ያለው ትክክለኛ የገበያ ዋጋ፣
2/ በፋብሪካ መሸጫ ዋጋ ላይ የተከፈለው የኤክሳይዝ ታክስ በግብይቱ ደረሰኝ ላይ ተለይቶ መታየት አለበት፡፡
በጥሬ ዕቃ/ግብዓት ላይ የተከፈለን ታክስ ስለማቀናነስ
1/ የተፈቀደለት አምራች የኤክሳይዝ ታክስ በሚከፈልባቸው ወደ አገር በገቡ ወይም በአገር ውስጥ በተመረቱ ጥሬ ዕቃዎች/ግብዓቶች ላይ የኤክሳይዝ ታክስ የከፈለ እንደሆነ እና እነዚህን ጥሬ ዕቃዎች/ግብዓቶች የመጨረሻውን ምርት (ከዚህ በኋላ “የመጨረሻ ምርት”) ለማምረት በግብዓትነት የተጠቀመባቸው ከሆነ፣ በጥሬ ዕቃዎቹ/ግብዓቶቹ ላይ የተከፈለው ታክስ በመጨረሻ ምርቶቹ ላይ ከሚከፈለው የኤክሳይዝ ታክስ ጋር እንዲቀናነስ ይደረጋል፡፡ ይሄ አልኮልን፣ ትንባሆን እና ስኳርን አይጨምርም፡፡
የኤክሳይዝ ታክስ በሚከፈልባቸው ዕቃዎች ላይ የሚደረግ ቁጥጥር
1/ ፈቃድ በተሰጠው አምራች ፋብሪካ ውስጥ የሚገኙ የኤክሳይዝ ታክስ የሚከፈልባቸው ዕቃዎች በታክስ ባለሥልጣኑ የኤክሳይዝ ታክስ ቁጥጥር (ከዚህ በኋላ “የኤክሳይዝ ታክስ ቁጥጥር” በሚል የሚጠራ) ይደረግባቸዋል፡፡
2/ በዚህ አዋጅ መሠረት የኤክሳይዝ ታክስ በሚከፈልባቸው ዕቃዎች ላይ የኤክሳይዝ ታክስ ቁጥጥር የሚደረገው ከሚከተሉት በቀደመው ጊዜ ይሆናል፡፡
ሀ) ፈቃድ በተሰጠው አምራች ፋብሪካ ውስጥ የሚገኙ ዕቃዎች በኢትዮጵያ ውስጥ ጥቅም ላይ እንዲውሉ ከፋብሪካው እስከሚወጡ፣
ለ) ዕቃዎቹ ከኢትዮጵያ ውጪ እስከሚላኩ፣ ወይም
ሐ) ዕቃዎቹ ከአገልግሎት ውጪ እስከሚደረጉ ወይም እስከሚወገዱ ድረስ፣
3/ ዕቃዎች በኤክሳይዝ ታክስ ቁጥጥር ስር እስካሉ ድረስ፣
ሀ) በታክስ ባለሥልጣኑ ሥልጣን የተሰጠው የባለሥልጣኑ ሠራተኛ በማናቸውም ጊዜ ዕቃዎቹን መመርመር ይችላል፣
ለ) በታክሱ ባለሥልጣን ከተፈቀደለት ሰው በስተቀር ማናቸውም ሰው ዕቃዎቹን ከፋብሪካ ማውጣት ወይም በማናቸውም ሌላ መንገድ ዕቃዎቹን የሚመለከት ማናቸውንም ተግባር መፈፀም አይችልም፡፡
4/ ዕቃዎች በኤክሳይዝ ታክስ ቁጥጥር ስር ባሉበት ጊዜ የታክሱ ባለሥልጣን የዕቃው ባለቤት ዕቃዎቹን ለታክሱ ባለሥልጣን እንዲያስረክብ ሊጠይቅ ይችላል፡፡ የታክሱ ባለሥልጣን ዕቃዎቹን ከተረከበ በኋላ ዕቃዎቹ በታክሱ ባለሥልጣን በሚሰጥ መመሪያ መሠረት በባለቤቱ ወጪ ሊሸጡ ወይም ከአገልግሎት ውጪ እንዲሆኑ ሊደረግ ወይም ሊወገዱ ይችላል፡፡
በኤክሳይዝ ታክስ ቁጥጥር ሥር ያሉ የኤክሳይዝ ታክስ የሚከፈልባቸውን ዕቃዎች በሚመለከት ፈቃድ የተሰጠው አምራች ግዴታዎች
1/ የኤክሳይዝ ታክስ ቁጥጥር የሚደረግባቸው የኤክሳይዝ ታክስ የሚከፈልባቸው ዕቃዎች በተገቢው የሂሳብ አያያዝ የተመዘገቡ መሆኑን ለማረጋገጥ፣ የተፈቀደለት አምራች፡-
ሀ) የታክሱ ባለሥልጣን በፋብሪካው ውስጥ የሚገኙ የኤክሳይዝ ታክስ የሚከፈልባቸውን ዕቃዎች ወይም ጥሬ ዕቃዎችን ለመመዝገብ፣ ክብደታቸውን ለመለካት፣ ለመቆጣጠር፣ ለመቁጠር እንዲችል ወይም እንደአስፈላጊነቱ ሌሎች ተመሳሳይ የቁጥጥር ሥራዎችን እንዲያከናውን በፋብሪካው ውስጥ የመለኪያ ወይም የመቁጠሪያ መሣሪያዎች እንዲኖሩ እና በሚገባ እንዲጠበቁ ማድረግ፣
ለ) በፋብሪካው ውስጥ የሚገኙ የኤክሳይዝ ታክስ የሚከፈልባቸውን ዕቃዎች የተሟላ ቁጥጥር ለማድረግ በሚያስችል መንገድ ማስቀመጥ፣
ሐ) የጥሬ ዕቃዎችን ምዝገባ ማካሄድ፣ በተለይም በማምረት ሂደት ጥቅም ላይ እንዲውሉ ፋብሪካው የተረከባቸውን ጥሬ ዕቃዎች እና ግብአቶች በእነዚህ ቅፆች ላይ መመዝገብ እና በየወሩ መጨረሻ የምዝገባውን ሚዛን ትክክለኛነት ማረጋገጥ፣
መ) የመጨረሻ ምርቶችን ምዝገባ ማከናወን፣ እና በዚሁ ቅጽ ላይ በፋብሪካው የተመረቱ የኤክሳይዝ ታክስ የሚከፈልባቸውን ዕቃዎች እና ከፋብሪካው የወጡ ዕቃዎችን መመዝገብ እና በየወሩ መጨረሻ የምዝገባውን ሚዛን ትክክለኛነት ማረጋገጥ፣
ሠ) የኤክሳይዝ ታክስ በሚከፈልባቸው በፋብሪካው ውስጥ ጥቅም ላይ በዋሉ ዕቃዎች ላይ የኤክሳይዝ ታክስ የተከፈለ መሆኑን ማረጋገጥ፣
ረ) ሚኒስትሩ በሚያወጣው መመሪያ እንዲሟሉ የሚጠየቁ ሁኔታዎችን የማሟላት ግዴታ አለበት፡፡ 

















Short info

× Chat