askwala.com - ደመናን ማዝነብ (cloud seeding)
Header







ደመናን ማዝነብ (cloud seeding)

Image name: cloud seeding.jpg

ደመናን ማዝነብ እየተለመደ የመጣ የሳይንስ ግኝት ነው። ደመና ከመሬት ከፍ ብሎ በሚገኝ ከባቢ ላይ በትነት መልክ የሚገኝ የውኃ ስብስብ ቅንጣት ነው። ይህ በሚሊዮን የሚቆጠር ወደዝናብ ያልተቀየረ ነጠብጣብ/ቅንጣት በንጥረ ነገር ርጭት አማካኝነት ከነጠብጣቡ ከፍ ብሎ እንዲያድግና ወደ መሬት ዝናብ ሆኖ እንዲወርድ ማድረግ ይቻላል። ይህ ነው ደመና ማዝነብ (cloud seeding) የሚባለው።
ደመና ያለበት አካባቢ ላይ በአውሮፕላን የኬሚካል ርጭት ይደረጋል። ንጥረ ነገሩ (ሲልቨር አይወዳይድና ፖታሺየም አይወዳይድ) ተበታትኖ የነበረው ደመና ላይ ሲያርፍ ደመናው እንዲሰበሰብና ወፈር ወዳለ የውኃ እንክብል እንዲቀየር ያደርገዋል። ይህ የውኃ እንክብል በመሬት ስበት አማካኝነት ወደ መሬት እንዲዘነብ ይገደዳል።
የንጥረ ነገር ርጭቱ ሀገራት እንዳላቸው አቅም ከመሬት ወደ ደመናው መርጭትም የሚቻልባቸው ሁኔታዎች አሉ።
በሮኬት መልክ መተኮስ የሚቻል ሲሆን በሰው አልባ አውሮፕላኖችም ርጭት ማድረግ ይቻላል። የተለመደው ግን በአውሮፕላን ከደመናው በላይ አልያም በታች እየበረሩ መርጭት ነው።
ኢትዮጵያ ሰሞኑን የሞከረችው በአውሮፕላን የሚረጨውን ሲሆን ከደመናው ስር በመሆን ንጥረ ነገሩን በአውሮፕላን የሚረጭበት ነው።
የተለያዩ የደመና አይነቶች ሲኖሩ ይህኛው ደመና የሚስብ/የሚነፍስ ንፋስ ስላለው ንጥረ ነገሩ ከስሩ ሲረጭ ከደመናው ጋር ወስዶ ይቀላቅለዋል።
ሁለተኛው አማራጭ ደግሞ ከመሬት ላይ በሚተከል "ግራውንድ ጀነሬተር" አማካኝነት ዝናብ ማዝነብ ሲሆን እዚህ ላይም ኢትዮጵያ ሥራዎችን እየሠራች ነው።
ንጥረ ነገሩን የሚረጭ "ግራውንድ ጄነሬተር" እንጦጦ ላይ ተከላ እያካሄደች ነው። ይህኛው አሠራር ተራራማ ቦታዎች ላይ ተተክሎ ከመሬት ቅርብ ወደ ሆነ ደመና ንጥረ ነገር እንዲረጭ የሚደረግበት ነው። ቁጥጥሩ ደግሞ ከሜትዮሮሎጂ ኤጀንሲ ባለ ማዕከል ላይ ይደረጋል።
ይህንን ሥራ ለመሥራት ኢትዮጵያ የተጠቀመችው ንጥረ ነገር በዋጋው ዝቅተኛ የሆነውን ሶዲየም ክሎራይድ እና ፖታሺየም ክሎራይድ ድብልቅ (ሃይድሮስኮፒክስ) የተሰኘውን ንጥረ ነገር ነው።
ይሄ ቴክኖሎጂ በተፈጥሮ የሚገኝ ደመናም ይፈልጋል። አየር ላይ ደመና ከሌለ ዝናብ ማመንጨት አይቻልም። ቴክኖሎጂው ደመና መፍጠር የሚያስችል አቅም ላይ አልደረሰም።
ይህንን ከደመና ዝናብ የማመንጨት ቴክኖሎጂ እስራኤል፣ ቻይና እና ዩናይትድ ዓረብ ኤምሬትስ በተለያየ መልኩ ይጠቀሙበታል። በርሃማ ቦታዎቻቸውን ማልማትም ችለዋል።
ከሀገራት በተጨማሪ የተለያዩ ተቋማትም ደመናን የማዝነብ ዘዴ እንደሚጠቀሙ ይነገራል።
የሃይድሮ ፓወር ኩባንያዎች በበጋ ወቅት የሚያጋጥመውን የውኃ እጥረት ለመቀነስ፤ የወይን አምራች ድርጅቶች የምርት ብክለት እንዳያጋጥም ለማድረግ፤ እንዲሁም የኢንሹራንስ ኩባንያዎች የሚደርሱ አደጋዎችን ለመቀነስ እንደተጠቀሙበት መረጃዎች ያሳያሉ።
ኢትዮጵያ ይህንን ቴክኖሎጂ ጥቅም ላይ ስታውል ዩናይትድ ዓረብ ኤምሬትስ የተለያዩ ድጋፎን አድርጋላታልች።
የኢትዮጵያ ባለሙያዎችም በሰፊው ተሳትፈውበታል። ከበረራ ጋር በተያያዘም የኢፌዴሪ አየር ኃይል የጥገና ባለሙያዎች እና አብራሪዎች ተሳትፈዋል።
ጠቅላይ ሚኒስትር አብይ አህመድ ያስጀመሩት እና የኢኖቬሽንና ቴክኖሎጂ ሚኒስቴር የሚመራው ይህ ሥራ የጠቅላይ ሚኒስትር ጽ/ቤት፣ የብሔራዊ ሜትዮሮሎጂ ኤጀንሲ፣ የተፋሰስ ባለሥልጣን፣ የሰው ሠራሽ አስተውሎ ማዕከል፣ የቴክኖሎጂ እና ኢኖቬሽን ኢንስቲትዩት፣ የኢንፎርሜን መረብ ደህንነት ኤጀንሲ፣ የስፔስ ሳይንስ ቴክኖሎጂ ኢንስቲትዩት እና ከግሉ ዘርፍ ድሮን ላይ የሚሠሩ ቡድኖች ተሳትፈዋል።
ኢትዮጵያ አሁን ዓለም ላይ ያለውን ቴክኖሎጂ መጠቀም ብቻ ሳይሆን መፍጠርንም መማር አለባት የሚሉት የኤኖቬሽናን ቴክኖሎጂ ሚኒስትር ዴኤታ አህመዲን መሀመድ (ፒ.ኤች.ዲ) ኢትዮጵያም ይህንን ቴክኖሎጂ በረሃማ ቦታዎችን ለማልማት በሰፊው ጥቅም ላይ ታውለዋለች ብለዋል።
ኢትዮጵያ ከዚህ ቀደም በረሃማና ከፍተኛ የውኃ እጥረት ያለባቸው አካባቢዎችን ለማልማት የሚያስችሉ አዳዲስ ቴክኖሎጂዎችን ወደ ሀገር ውስጥ የማስገባት ሂደት በቅርቡ እንደሚጀመር ይፋ አድርጋ ነበር። 

















Short info

× Chat