askwala.com - ከባድ የሰው መግደል ወንጀል የፈጸመው ግለሰብ በእድሜ ልክ ጽኑ እስራት ተቀጣ፡፡
Header







ከባድ የሰው መግደል ወንጀል የፈጸመው ግለሰብ በእድሜ ልክ ጽኑ እስራት ተቀጣ፡፡


ተከሳሽ ከድር ሽፈራው ሀሰን በ1996 ዓ.ም የወጣውን የወንጀል ህግ አንቀጽ 539/1/ሀ ስር የተመለከተውን ድንጋጌ በመተላለፍ ሰውን ለመግደል አስቦ መስከረም 25 ቀን 2011 ዓ.ም በግምት ከለሊቱ 10፡00 ሰዓት ሲሆን በቦሌ ክፍለ ከተማ ወረዳ 14 ልዩ ቦታው ገርጂ ወፍጮ ቤት አካባቢ ተከሳሽ ተከራይቶ በሚኖርበት ቤት ውሰጥ ነው ወንጀሉን የፈጸመው፡፡
ይህ ይሆናል ብላ ያላሰበችው የተከሳሹ የፍቅር ጓደኛ የሆነችው ሟች ራሔል አስመላሽ ከፍቅረኛዋ ጋር ጥሩ ጊዜ ለማሳለፍ አስባ ነበር ወደ ቤቱ አብራው ለማደር የሄደችው፣ ታድያ ያሰበችው ሳይሆን ቀረና የፍቅር ጓደኛ ምናልባትም የወደፊት የትዳር አጋር ይሆነኛል ብላ ባሰበችው ሰው ምክንያቱ እስካሁን በውል ባልታወቀ ምክንያትና ለሰሚም ግራ በሚያጋባ፣ ብሎም ከሰዋዊ ባህሪ ባፈነገጠ እጅግ ዘግናኝ በሆነ መልኩ ለእልፈተ ሂወት ተዳረገች፡፡
ተከሳሹ የፍቅር ጓደኛውን የገደለው ቤቱ ውስጥ የነበሩትን ሁለት ቢላዎች ተጠቅሞ ሲሆን አንገቷን በመቁረጥና ከሌላው ሰውነቷ በመለያየት፣ እንዲሁም የተቀሩት የሰውነት ክፍሎቿን በመቆራረጥና ለየብቻ በማድረግ ለአያያዝ እንዲመቸው በፌስታል ጠቅልሎ በሁለት ጥቁር ሻንጣና በአንድ የጀርባ ቦርሳ በመክተትና ተጓዥ መንገደኛ በመምሰል ላዳ ተከራይቷል፤ ከዛም ሻንጣዎቹንና የጀርባ ቦርሳውን ኮንትራት በያዘው ላዳ ታክሲ በመጫን ወደ አቃቂ ቃሊቲ ክፍለ ከተማ ወረዳ 9 ልዩ ቦታው አዲስ አበባ ሳይንስና ቴክኖሎጂ ዩኒቨርስቲ ጀርባ አካባቢ ያመራል፤ ሲደርሱ ከታክሲው ላይ ሻንጣውን ይዞ በመውረድ ሁለት እግሮቿንና ከአንገቷ በታች እስከ እግሯ ድረስ ያለውን የሰውነት ክፍሏን የያዘውን ሁለት ሻንጣ መንገድ አጠገብ ጥሎ ከህግና ከተጠያቂነት ለማምለጥ የተሰወረ ሲሆን በአካባቢው ህብረተሰብ ጥቆማ በቁጥጥር ስር ሊውል ችሏል፡፡
የአስክሬኑን ምርመራ ውጤት የሚያሣየውን የህክምና ማስረጃ ሰነድ ጨምሮ በምርመራ ሂደት የተሰበሰቡትን ማስረጃዎች መሰረት አድርጎ ተከሳሽ ጨካኝነቱን፣ ነውረኝነቱን፣ እና አደገኝነቱን በሚያሳይ ሁኔታ በፈጸመው ከባድ የሰው ግድያ ወንጀል እንዲጠየቅ ዐቃቤ ህግ ክስ መስርቶበታል፡፡
የፌዴራል ከፍተኛ ፍርድ ቤት ልደታ ወንጀል ችሎትም ዐቃቤ ህግ ባቀረበው ክስ መሰረት የቀረቡትን ማስረጃዎች መርምሮ ዐቃቤ ህግ እንደ ክሱ ያስረዳ ቢሆንም ተከሳሽ ማስተባበል ባለመቻሉ በከባድ የሰው ግድያ ወንጀል ስር ጥፋተኛ ነህ ሲል የጥፋተኝነት ውሳኔ አስተላልፏል፡፡
ቅጣት መጣልን በተመለከተ የተከሳሹ ድርጊት የተለየ ጭካኔና ነውረኝነት የተንጸባረቀበት ወንጀል አፈጻጸሙም እጅግ ከባድ በመሆኑ በቅጣት አወሳሰኑ መመሪያ ቅጣት መወሰን ፍትህን ሊያሰፍን ስለማይችል ከቅጣት አወሳሰን መመሪያ በመውጣት ቅጣት ለመወሰን ተገዷል፡፡
በዚሁም መሰረት ፍርድ ቤቱ መጋቢት 9 ቀን 2013 á‹“.ም በዋለው ችሎት ተከሳሽ በእድሜ ልክ ጽኑ እስራት እንዲቀጣ ተወስኖበታል፡፡ 

















Short info

× Chat