askwala.com - ሲአይኤ ኦሳማ ቢን ላደን ለማደን የሄደበት መንገድና ያልታለመ መዘዙ
Header







ሲአይኤ ኦሳማ ቢን ላደን ለማደን የሄደበት መንገድና ያልታለመ መዘዙ


የአሜሪካኑ የስለላ ተቋም ሲ.አይ.ኤ የአልቃይዳውን መሪ ኡሳማ ቢን ላደንን ለመያዝ መንገድ ይመራው ዘንድ ፓኪስታን ውስጥ ሐሰተኛ የክትባት ዘመቻ ማከናወኑ ከግለሰቡ ግድያ በኋላ ክትባትን የመቃወም አባዜ እንዲያቆጠቁጥ አድርጎ እንደነበር ተረጋገጠ፡፡ በአውሮፓውያኑ 2011 ላይ ሲአይኤ አቦተባድ በተሰኘው የፓኪስታን ክፍል ውስጥ የሄፒታይተስ ቢ ክትባት ለህፃናት የማቅረብ ሐሰተኛ የክትባት ዘመቻን ጀመረ፡፡ ሆኖም ይህን ሲያደርግ በሚስጥር ቋጥሮት የነበረው አንድ ጉዳይ በወቅቱ ከአንድ ዓመት በፊት አሜሪካን ውስጥ ሳለች ህይወቷ ያለፈውን የቢን ላደን እህት ዲኤንኤ ይዘው ከሌሎች ጋር እያነፃፀሩ መሆኑን ነው፡፡ በአጭሩ ሲአይኤዎች ከቢን ሌዲን ጋር ዝምድና ያላቸው ህፃናትን በማፈላለግ ግለሰቡ ያለበትን ስፍራ ለማግኘት ሲጥሩ ነበር፡፡
ኋላ ላይ የዚህ ተግባር ሪፖርት ሲቀርብ በፓኪስታን ተቃውሞ እንዲነሳና አክራሪ ፓርቲዎችም ፀረ ክትባት ዘመቻን እንዲጀምሩ ምክንያት ሆነ፡፡ ስፔን፤ ማድሪድ ውስጥ በሚገኘው የገንዘብ እና ፋይናንስ ጥናት ማዕከል የምትሰራው ሞኒካ ማርቲኔዝ-ብራቮ እና የእንግሊዙ ዩኒቨርሲቲ ኦፍ ዋሪክ አጋሯ አንድሬያስ ስቴግማን ይህ ሁኔታ በሀገሪቱ የክትባት እንቅስቃሴዎች ላይ ያደረሰውን ተፅዕንዖ ሲመረምሩ ቆይተዋል፡፡ ለጥናታቸው ግብዓት የሚሆን 18,795 ህፃናት ላይ የተሰራ መረጃን ከፓኪስታን የማህበራዊና የኑሩ ደረጃ መለኪያ ሰርቬይ ወስደዋል፡፡ ሰርቬዩ እ.አ.አ ከጥር 2010 እስከ ሐምሌ 2012 ከሀገሪቱ 115 አውራጃዎች ላይ የተወሰደ ነው፡፡ መረጃው አዲስ የተወለዱ ህፃናት የዲፕቲዬሪያ፣ መንጋጋ ቆልፍና ፔታቲስ (DTP)፣ ፖሊዮ እንዲሁም ኩፍኘኝን መከላከያ ክትባት መውሰድ አለመውሰዳቸውን የሚያመላክት ነው፡፡ በማስከተልም ከሁነቱ ቀረብ ብሎ የተደረገው የፓኪስታን ብሔራዊ ምርጫን በመውሰድ የእያንዳንዱ አውራጃን ፖለቲካዊ አቋም ተመልክተዋል፡፡
በውጤቱም አክራሪ እስላማዊ ፓርቲዎች ከፍተኛ ድጋፍ በነበራቸው ቦታዎች ላይ ድጋፋቸው አነስተኛ ከሆኑት ጋር ሲነፃፀር የመንጋጋ ቆልፍና ፔታቲስ ክትባት ስርጭት በ23 በመቶ ሲወርድ የፖሊዮ እና ኩፍኝ ክትባቶች ደግሞ በ28 እና 39 በመቶ ወርዷል፡፡ ከዚህ በተጨማሪም ከወንዶች ጋር ሲነፃፀር የሴቶች የክትባት መጠን በአማካኝ በሦስት በመቶ መውረዱን ጥናቱ አረጋግጧል፡፡ ይህ ግን ምናልባትም በወቅቱ የታሊባን የፓኪስታን ክንፍ ሲያሰራጨው ከነበረው ክትባቶች ወጣት ሴቶችን መሀን ለማድረግ ተብለው የሚሰጡ መሆናቸውን የሚያትት አሉባልታ ጋር በተያያዘ ሊሆን ይችላል፡፡ የጥናት ቡድኑ የክትባት ስርጭቱ መቀነሱን ተከትሎ በሽታ ጨምሮ ይሆን ወይ የሚለውን ለማወቅ ባደረጉት ምልከታም እነዚህ ከፍተኛ ፓርቲዎች ከፍተኛ ድጋፍን በሚያገኙባቸው ቦታዎች ላይ ከሌሎቹ አንፃር የፖሊዮ ተያዦች ቁጥር በ1.66 የላቀ ሆኖ አግኝተውታል፡፡ ይህም በእጥፍ የላቀ ነው፡፡
ሆኖም ለክትባቶች ያለው ተቃውሞ ብዙም የዘለቀ አልሆነም፡፡ በሁለት ዓመታት ውስጥ ነገሮች ወደነበሩበት መመለሳቸውን ሞኒካ ተናግራለች፡፡
ይህ የጥናቱ ውጤት ታድያ አሁን በኮቪድ-19 ክትባቶች ላይ የሚቀርበው አሉባልታ ሊያመጣ ስለሚችለው በጎ ያልሆነ ውጤት አመላካች እንደሚሆን ተነግሮለታል፡፡ 




© New Scientist   













Short info

× Chat