askwala.com - የሩሲያ ሀከሮች ጥቃት እንደቀጠለ ነው ሲል ማይክሮሶፍት ተናገረ
Header







የሩሲያ ሀከሮች ጥቃት እንደቀጠለ ነው ሲል ማይክሮሶፍት ተናገረ

Image name: Russian hackers.jpg

ባሳለፍነው የፈረንጆች አመት በርካታ የአሜሪካን ተቋማትን ያጠቃውና በሩሲያ መንግስት ይደገፋል ተብሎ የሚታማው የሀከሮች ቡድን በሀገሪቱ የመንግስት ቢሮዎች፣ የምሁራን መድረኮች፣ አማካሪዎች እንዲሁም ሌሎች ድርጅቶች ላይ ጥቃቱን ቀጥሏል ሲሉ ኃላፊዎችና አጥኚዎች ተናገሩ፡፡ በማይክሮሶፍት አማካኝነት ባሳለፍነው ሳምንት የወጣው መረጃ የሚያመላክተው ኖቢሊየም የተሰኘው ቡድኑ በተለይ በውጪ ጉዳይ ፖሊሲዎች ላይ ትኩረታቸውን አድርገው በሚሰሩ መንግስታዊ ተቋማት ላይ የሚያደርሰውን ጥቃት መጨመሩን ነው፡፡ የአሜሪካን ሳይበር ደህንነት እና መሰረተ-ልማት ኤጀንሲም ይህን የማይክሮሶፍት መረጃ በመጠቆም የሚመለከታቸው ተገቢውን የመከላከያ እርምጃ ይወስዱ ዘንድ ማሳሰቢያ ሰጥቷል፡፡
በማይክሮሶፍት የቀረበው መረጃ ውስብስብ እና በከፍተኛ መጠን የተስፋፋ የጥቃት ወጥመድ የሆኑ ኢ-ሜይሎችን (Phishing) የመላክ ዘመቻ ማስተዋሉን ይገልፃል፡፡ ይህም እንደ ማይክሮሶፍት ምክትል ፕሬዘዳንት ከሆነ ከ150 የተለያዩ ተቋማት የተውጣጡ 3 ሺህ ኢ-ሜይል አካውንቶች በጥቃት ኢላማው ውስጥ ያስገባ ነው፡፡ ይህ ዜና የተሰማው ዋሽንግተን በባለፈው ዓመት የሶላርዊንድ ጥቃትና ሌሎች መንስኤዎች መነሻነት የተወሰኑ የሩሲያ ዲፕሎማቶችን ከሀገሯ ካባረረችና በሩሲያ ላይም ማዕቀብ ከጣለች ከወራት በኋላ መሆኑ ትኩረትን ስቧል፡፡
አዲሱ ጥቃት ሀከሮቹ የኢ-ሜይል ሰርቨሮቹ ውስጥ መግባትና ሀሰተኛ ኢሜሎችን በስፋት እንዲልኩ ማስቻሉ ተጠቅሷል፡፡ ከተላኩት ሀሰተኛ ኢ-ሜይሎች መካከልም የቀድሞው ፕሬዘዳንት ዶናልድ ትራምፕ በምርጫ ማጭበርበር ዙርያ አዲስ ሰነድ ይፋ ማድረጋቸውን የሚገልፅ ይገኝበታል፡፡ ይህን ተመልክተው ሊንኩን የተጫኑ ሰዎች ታድያ ሀከሮቹ የግል መረጃዎቻቸውን እንዲበረብሩባቸው የሚያስችለው ሶፍትዌር እንዲጫንባቸው ይሆናል፡፡
ባሳለፍነው ዓመት የተሰነዘረው የሶላርዊንድ ጥቃት 18 ሺህ ደንበኞችን እና ከ100 በላይ የሀገሪቱን ተቋማትን ተጎጂ አድርጎ ነበር፡፡ የጥቃቱ ሰለባ ከሆኑት መካከል በዓለማችን 500 ግዙፋን ኩባንያዎች ዝርዝር ውስጥ የተካተቱት የአሜሪካን ኩባንያዎች ይገኙበታል፡፡ 




© Tech Xplore   













Short info

× Chat