askwala.com - አፈትልከው የወጡት የአሜሪካን ምስጢራዊ ኒውክለር ጦር መሳርያ መረጃዎች
Header







አፈትልከው የወጡት የአሜሪካን ምስጢራዊ ኒውክለር ጦር መሳርያ መረጃዎች

Image name: US soldiers accidentally leak nuclear secrets.jpg

በአውሮፓ ምድር የአሜሪካን ኒውክለር ጦር መሳርያዎች ተከማችተው በሚገኙባቸው ጦር ሰፈሮች ውስጥ የሚያገለግሉ የአሜሪካን ወታደሮች ረጅምና ውስብስብ የሆኑትን የኒውክለር ኮዶችን ለማስታወስ ይረዳቸው ዘንድ ለህዝብ ክፍት በሆኑ የፍላሽካርድ መተግበሪያዎች ላይ እንደሚያስቀምጧቸው ቤሊንግካት የተሰኘው በድረ-ገፆች ላይ የምርመራ ጋዜጠኝነት ስራን የሚሰራ ገፅ አስታወቀ፡፡ ወታደሮቹ በድረ ገፆቹ ላይ ለማስታወስ አስቀምጠዋቸው ከተገኙት ምስጢራዊ መረጃዎች መካከል ኮዶች፣ ስውር መግባብያ ቃላት እንዲሁም የኒውክለር ማከማቻዎቹን መገኛ ይፋ የሚያደርጉት ይገኙበታል፡፡
ከዚህ ቀደም የአውሮፓ መንግስታት የአሜሪካን ኒውክለር ጦር መሳርያዎች በሀገራቸው መኖራቸውን ወይም አለመኖራቸውን ለመናገር ፈቃደኛ ሳይሆኑና ሲያስተባብሉ ቢቆዩም አፈትልከው የሚወጡ ሰነድ፣ ፎቶዎችና ጡረታ የወጡ ኃላፊዎች አስተያየቶች መሳርያዎቹ እዚያ ስለመኖራቸው በተደጋጋሚ ጥቁምታን ሲሰጡ ነበር፡፡ ሆኖም አዲስ የወጣው ምስጢራዊ መረጃ ከዚህም አንድ ደረጃ ተሸግሮ በጦር ሰፈሮቹ ውስጥ ያሉት የኒውክለር መሳርያዎች ብዛት፣ የቱ የቱ ጋር እንዳሉ እንዲሁም መሳርያዎቹ የተከማቹበት ክፍል ሙቅ አልያም ቀዝቃዛ መሆኑን የሚያሳይ ነው፡፡
ምስጢራዊ መረጃውን መርምሮ ዘገባውን የፃፈው ፎካ ፖስትማ እንደሚለው አጥኚዎቹ የወታደሮቹን ፍላሽካርድ ማግኘት የቻሉት ከኒውክለር የጦር ሰፈር ጋር ሊገናኙ የሚችሉ አንዳንድ ነሮችን አስገብተው በይነ-መረብ ላይ በማፈላለግ (ሰርች በማድረግ) ነው፡፡ በዚህም ጀርመን፣ ኔዘርላንድ እና ቱርክን ጨምሮ በመላው አውሮፓ የሚገኙትን የጦር ሰፈሮችን መረጃ የያዙ ፍላሽካርዶችን ማግኘት ችለዋል፡፡ አጥኚዎቹ ካገኟቸው 70 ፍላሽካርዶች መካከል "Study!" በሚል ርዕስ የተቀመጠው አንደኛው ካርድ በኔዘርላንዱ የፎልኮል አየር ኃይል ሰፈር ውስጥ ዝግጁ ሆነውና ሳይሆኑ በማከማቻዎች ውስጥ የተቀመጡትን የኒውክለር ጦር መሳርያዎችን ብዛት ያሳየ ሆኗል፡፡ ይህ ታድያ በኔዘርላንድ መንግስት ዘንድ በሚስጥርነት ተይዞ የቆየ መረጃ ነው፡፡ ሌሎች ያፈተለኩት መረጃዎችም ወታደሮቹ ምን ሲፈጠር እንዴት ምላሽ መስጠት እንዳለባቸው፣ የደህንነት ካሜራዎቹ የት የት ቦታ ላይ እንደሚገኙ እንዲሁም አንድ አደጋ ሲፈጠር ወታደሮቹ በምን አየይነት ስውር መግባብያ ቃላት እንደሚነጋገሩ ያመላክታሉ፡፡
ቤሊንግካት ያገኛቸው መረጃዎች እድሜያቸው ከአውሮፓውያኑ 2013 እስከ ያዝነው ዓመት ሚያዝያ 2021 ድረስ የዘለቁ ናቸው፡፡ ገፁ ያገኛቸውን ውጤቶች ይፋ ከማድረጉ አስቀድሞ ኔቶ እና የአሜሪካን ጦር ኃይልን አስተያየት የጠየቀ ሲሆን ምስጥራዊ ሰነዶቹን የያዙት ካርዶችም ኋላ ላይ እንዲነሱ ተደርገዋል፡፡ 




© DW   













Short info

× Chat