askwala.com - በቺፕ እጥረት ምክንያት የመኪና ምርቱን በ40 በመቶ የቀነሰው ቶዮታ
Header







በቺፕ እጥረት ምክንያት የመኪና ምርቱን በ40 በመቶ የቀነሰው ቶዮታ

Image name: Chip shortage.jpg

ከቅርብ ጊዜያት ወዲህ ብዙ የቴክኖሎጂ ድርጅቶች ከሴሚኮንዳክተር እጥረት ጋር በተያያዘ የምርት መዘግየት እንዳጋጠማቸው ሲገልፁ ቆይተዋል፡፡ የኮቪድ ወረርሽኝ አባብሶታል የሚባለው የሴሚኮንዳክተር እጥረት በተሸከርካሪ፣ በኮምፒውተር፣ በስልክ፣ በቴሌቪዥን እና በሌሎች ተያያዥ የቴክኖሎጂ ምርቶች ላይ ጥቁር ጥላውን በማጥላት ከፍተኛ የአቅርቦት ችግር እንዲከሰት ምክንያት ሆኗል፡፡
ግዙፉ የመኪና አምራች ድርጅት ቶዮታ ይህ እጣ ፋንታ ከደረሳቸው ኩባንያዎች አንዱ ሲሆን በተለይም ወረርሽኙ በደቀነው አለም አቀፍ ፈተና ዝግ ሆነው የቆዩት አብዛኞቹ አምራች ድርጅቶች እና የኢኮኖሚው ውድቀቱ ለእጥረቱ መከሰት እንደዋና ምክንት ተቀምጧል፡፡ ድርጅቱ በቀጣዩ የመስከረም ወር 900,000 መኪናዎችን አምርቶ ለማጠናቀቅ እቅድ የዞ የነበረ ቢሆንም በአለም አቀፍ ደረጃ በሴሚኮንዳክተር ምርት ዙሪያ ከፍተኛ እጥረት መከሰቱን ተከትሎ የመኪና ምርቱን በ40 በመቶ ለመቀነስ ተገዷል፡፡ ለአለም አቀፍ ገበያ በቀጣዮቹ ወራት ይቀርባሉ ተብለው እቅድ ከተያዘላቸው 900,000 መኪናዎችም 540,000 የሚደርሱት የመኪና ምርቶች አንዲቀነሱ መደረጋቸውን ኩባንያው አስታውቋል፡፡
በአለም አቀፍ ደረጃ በተከሰተው የቺፕ እጥረት አብዛኞቹ የመኪና አምራች ድርጅቶች የመጨረሻ ምርታቸውን ለማዘገይት እና በተለያየ መጠን ለመቀነስ የተገደዱ ሲሆን በተለይም እንደ ቮልስዋገን ጀነራል ሞተርስ፣ ፎርድ እና ኒሳን ያሉ ትልልቅ ኩባንያች በእጥረቱ ምክንያት ምርታቸውን በከፍተኛ ደረጃ ቀንሰዋል፡፡ የሴሚኮንዳክተር አምራች የሆነው ኢንቴል ዋና ስራ አስፈፃሚ ፓት ጌልሲንገር በዓለም አቀፍ ደረጃ የተከሰተው ይህ የቺፕ እጥረት ከዚህ በኋላ ወደ መደበኛ አቀርቦቱ ለመመለስ ቢያንስ እንኳን የአንድና የሁለት አመት ጊዜ ሊያስፈልግ እንደሚችል ይናገራሉ፡፡
በአሜሪካ መሰረቱን ያደረገ የሰሚኮንዳክተር ኢንዱስትሪ ማህበር ይፋ ባደረገው መረጃ በአለም አቀፍ ደረጃ 75 በመቶ የሚሆነው የሰሚኮንዳክተር የምርት አቅርቦት በምስራቅ እስያ የሚሸፈን ሲሆን የታይዋኑ TSMC እና የደቡብ ኮሪያው ሳምሰንግ ኩባንያ በዚህ አቅርቦት ላይ የአንበሳውን ድርሻ የሚወስዱ ናቸው፡፡ በዚህ መስክ የአውሮፓ መንግስታት እና ፖለቲከኞች በሀገራቸው ምርቱ እንዲስፋፋ ይበልጥ ፍላጎት እያሰደሩ መምጣታቸው እና አሜሪካ ከቻይና ጋር የገቡበት የንግድና ቴክኖሎጂ ጦርነት ችግሩን እያባባሰው መምጠቱ የሚገለጽ ነው፡፡ 

















Short info

× Chat